طه سَيد المرسلين!!!بقلم الشاعر حسين الساعدي

[يادليل المتحيرين]

نعزي صاحب العصر والزمان ع والامة الاسلاميه بذكرى وفاة سيد الانسانيه لرسول محمد صل الله عليه واله وسلم


اليوم وَدَعنه نبينه!

اليوم وَدعنه نبينه
طه سَيد المرسلين

ابحضن حيدر ولينه
ونطفه ضَي السنين

اتوجه الصوب المدينه
يا موالي يا حزين!!

كَله طر كَبرك وشوف
اشصار بعدك يا امين!

شوف بعدك جَم منافق
طَلَع الحقد الدفين!!!

وال بيتك ضيم شافوا
لا مودة إولا حَنين

لو ابسم الغدر طاحوا
لو ذَبح من الوتين

كَسروا ضلع الوديعه
وسقطوا محسن جنين

وانطبر حيدر وَصيك
امخضب ابدم الجبين

والحسن سموه بعدك
ال امية المَلاعِيين

وانذبح بالطف حَبيبك
وال بيته امشردين

حتى زواره اذبحوهم
جي مِشوله معتنيين

شَرد اخبرك يا محمد
ياخَبر بيه تستكين!

كون شاهدت المأسي
ماتكف من الأنين

والحزن خَيم علينه
ابيوم ما غمضت عين

وليه ياطه انولينه
وين ننطي الوجه وين

رجعوا اعلينه ال امية
اوياهم الشمر اللعين

وحنه كل ذَنب الجنينه
لأن الكم منتمين!!

تَرسوا بينه المقابر
هالنواصب حاقدين

ابغيبتك دنيانه صَعبه
اي وحق الله المعين

ابذكرى موتك يا نبينه
حاير ابدمعة العين!

مدري اَعزيك ابمصابك
مَدري اَعزي بالحُسين!

بقلم
حسين الساعدي